VOV4.Jarai - Lơ 11/10, Khua tơhan krên dên ơi Tô Lâm, Khua ding jum kông ang hơmâo mông jơnum lăng nao rai mơng ataih hăng yă Josephine Teo, Khua ding jum pôr pơhing ngă rah Khua ding jum pơhlôm hơđong amăng plang internet Singapore. Khua ding jum ơi Tô Lâm lăi rơđah, tơlơi rô nao rai ngă hrŏm kơplah wah Việt Nam - Singapore amăng thun blan laih rơgao ƀu pơdơi hơkrŭ kjăp hăng pơđĭ kyar amăng djop mơta bruă. Tơlơi rô nao rai kơplah wah Ding jum kông ang Việt Nam hăng hơdôm anom bruă pơhlôm rơnuk rơnua amăng Singapore tŏ tui kjăp hăng pơđĭ kyar.

Jơnum lăng nao rai mơng ataih kơplah wah Ding jum kông ang Việt Nam hăng Ding jum pơhlôm hơđong amăng plang internet Singapore

Ding jum kông ang Việt Nam hăng hơdôm anom bruă bơdjơ̆ nao dêh čar Singapore hơmâo ƀơƀrư̆ pơwŏt glăi hơdôm bruă ngă hrŏm, pơlăi nao rai kơplah wah hơdôm anom bruă bơdjơ̆ nao mơng dua bơnah kiăng kơ pơlăi nao rai hơdôm tơlơi ngă hrŏm amăng bruă pơhlôm hơđong amăng plang internet hăng pơgăn ƀing ngă soh amăng plang internet. Gah ƀing gơñu, yă Josephine Teo pơsit tong Singapore amra pơtrut pơlăi nao rai, ngă hrŏm hăng hơdôm dêh čar pơdrong asah, rơgơi boh thâo măi mok anun lĕ Mi, Japan, Hàn Quốc kiăng kơ hơdôm dêh čar anai dong yua, djru brơi hơdôm anom bruă bơdjơ̆ nao amăng pơhlôm hơđong plang internet amăng kual ASEAN dưi tŭ mă hơdôm măi mok phrâo kiăng yua pơhlôm hơđong amăng plang internet.

Siu Đoan: Pơblang