VOV4.Jarai - Tlam lơ 28/6, Khua mua mơng anom bruă pơgang rơnuk rơnua Việt Nam yua Đaị Tướng ơi Tô Lâm, Khua ding jum Kông ang ba jơlan hlâo nao jơnum bơkơtuai hăng khua mua pơprong Khul hơdôm boh dêh čar kual ASEAN - Nga tal blung a pơphun lăng nao rai amăng tivi. Đĭ pơhiăp amăng mông jơnum, Khua ding jum kông ang ơi Tô Lâm lăi pơtong, anai lĕ jơnum yôm phăn, kiăng pơtrut hăng ngă dơlăm tui tơlơi rô nao rai ngă hrŏm kơplah wah kual ASEAN - Nga; lăi pơtong khŏm gơgrong dong kiăng pơtrut ngă tui hơdôm tơlơi pơsit phrâo anai dưi mă yua sit nik hăng lăp djơ̆, ngă hrŏm, pơlăi nao rai tơlơi găn rơgao kơplah wah dêh čar kual ASEAN - Nga kiăng gum hrŏm pơsir hĭ hơdôm bruă hrŏm. Khua ding jum ơi Tô Lâm rơkâo, pơ anăp anai, hơdôm dêh čar amăng kual kiăng pơjing tơlơi đăo gơnang tơdruă, pơphun bưp nao rai kiăng kơ pơlăi nao rai tơlơi pơmĭn, hmao tlôn pơsir hĭ tơnap tap, pơtrut ngă hrŏm ba glăi tơlơi dưi hrŏm, pơđĭ kyar bơwih ƀong huă - mơnuih mơnam hơđong kjăp. Amăng mong jơnum, ƀing khua mua hơmâo pơčrông sai hơdôm hơdră bruă kiăng kơ pơhlôm hơđong bruă kơđi čar, pơgang rơnuk rơnua ƀơi kual ASEAN hăng pok prong wŏt amăng kual Asia - Thái Bình Dương dong.

Siu Đoan: Pơblang