VOV4.Jarai - Tlam lơ 5/1, Khua ding jum kông ang ơi Tô Lâm ba jơlan khua mua mơng Ding jum Kông ang Việt Nam pơhmư̆ mông jơnum Khua ding jum kơ bruă ngă hrŏm pơgăn ƀing ngă soh tal 3, lăng nao rai amăng tivi kơplah wah 3 boh dêh čar Việt Nam - Lao hăng Kur. Ƀơi mông jơnum, Khua ding jum kông ang ơi Tô Lâm tŭ ư hăng tơlơi pơmin ngă hrŏm pơgang lŏn ia - rơnuk rơnua jing “gong tơmeh phun” amăng tơlơi rô nao rai 3 bơnah, khŏm ngă tui tơlơi phiăn ƀu brơi pô hlơi drơi hơpă mă lŏn ia anai pơkơdong glăi, tek nao bruă amăng lŏn ia adih. Pơđut mông jơnum, ƀing khua ding jum hơmâo kĭ Tơlơi tŭ ư hrom Jơnum khua ding jum Việt Nam - Lao - Kur kơ bruă ngă hrŏm pơgang, pơgăn ƀing ngă soh tal 3. Amăng anun lăi glăi dong tơlơi kĭ pơkôl ngă hrŏm wai lăng rơnuk rơnua dua bơnah hăng 3 bơnah lăp djơ̆ hăng tơlơi hơmâo lăi nao amăng Akŏ bruă ngă hrŏm dua bơnah rim thun hơmâo kĭ giăm anai hăng Hră ngă hrŏm dua bơnah mơng klâo Ding jum.

Siu H’Mai: Pơblang