VOV4.Jarai - Mơguah lơ 15/11, Đại tướng Tô Lâm, Ding kơna Ding jum kơđi čar, Khua Ding jum Kông ang hmâo mông mă bruă hăng Khua phun tơring čar Điện Biên. Pơhiăp amăng mông mă bruă, Đại tướng Tô Lâm, Ding kơna Ding jum kơđi čar, Khua Ding jum Kông ang pơsit yôm hơdôm bôh than mơ̆ tơring čar Điện Biên dưi ngă amăng hơdôm hrơi rơgao. Gah bruă mă phun pơ̆ anăp anai, Đại tướng Tô Lâm rơkâo tơring čar Điện Biên pơtrut kơtang dong bruă mă phun, kah hăng Rơwang bruă pơkra glăi Tơdrun dŭ pơgiăng hăng rơdêh por Điện Biên hăng tơhnal lăng kual; pơdŏng hơdôm rơwang bruă pơđĭ kyar bruă đang hmua tui hơdră phrâo; ngă pơhư̆č tuh pơplai pơlar phun mắc ca kiăng djơ̆ hăng tơhnal pơkă gôm lŏn hong rah hăng djru mơnuih mă bruă hmâo bruă mă, prăk pơhrui glăi hơđong. Ră anai, tơlơi hơdip mơnuih ƀôn sang ƀơi kual čư̆ siăng ăt dô̆ tơnap tap mơn; sa dua anih anom ăt akă hmâo apui lơtrik lŏn ia ta mơn, yua anun tơring čar Điện Biên kiăng gơgrong hlâo hloh dong amăng pok pơhai hơdôm jơlan hơdră, rơwang bruă anăp nao plơi pla, anăp nao tơhnal pơđĭ tui tơlơi hơdip mơda mơng mơnuih ƀôn sang, ba glăi trơi pơđao, yâu mơ-ak sit nik kơ mơnuih ƀôn sang./.

Siu H’ Prăk: Pô pơblang