VOV4.Jarai - Tŭ ư hăng tơlơi jak iâu mơng Đại tướng Phan Văn Giang - Ding kơna Ding jum kơđi čar, Khua ding jum ling tơhan Việt Nam, Ơi Kishi Nobuo - Khua ding jum ling tơhan dêh čar Japan rai čuă sit nik dêh čar Việt Nam dong mơng lơ 10-12/9. Dua čô khua ding jum hơmâo pơphun jơnum bơkơtuai, lăng glăi tơlơi tô nao rai amăng bruă ling tơhan amăng thun blan laih rơgao, pơčrông sai kơ bruă amăng jar kmar, amăng kual dua bơnah đing nao. Amăng anun, hơmâo bruă yôm phun kiăng ngă rơngai amăng kual ia rơsĭ hăng rơngĭt adai ƀơi anăp kơ tơlơi tơnap tap amăng kual ră anai.

Dua čô khua ding jum hăng khua mua pơkŏn phĭn rup hrŏm

Dua bơnah pơsit tong glăi tơlơi yôm lơ̆m ngă tui hơdôm tơlơi phiăn amăng jar kmar, hơmâo Tơlơi pơkôl mơng Sang gum hơbit djop dêh čar kơ Tơlơi phiăn kuai ia rơsĭ thun 1982 (UNCLOS 1982); pơčrông sai kơ tơlơi găn rơgao amăng pơgang klin Covid-19 mơng khul ling tơhan dua bơnah. Amăng thun blan pơđĭ kyar phrâo amăng tơlơi rô nao rai ngă hrŏm bruă ling tơhan kơplah wah Việt Nam - Japan, dua bơnah pơsit amra pơtrut kơtang bruă ngă hrŏm, sit biă ñu hơdôm jơlan hơdră pơbưp nao rai khua mua hăng ngă hrŏm djop bơnah, kiăng pơgôp lu dong amăng pơhlôm rơnuk rơnua hăng hơđong, pơđĭ kyar amăng kual hăng jar kmar.

Siu Đoan: Pơblang