VOV4.Jarai - Tŭ ư tơlơi jak iâu mơng Đại tướng Phan Văn Giang, Khua ding jum ling tơhan Việt Nam, ơi Lloyd Austin, Khua ding jum ling tơhan Mi rai čuă Việt Nam sit nik mơng lơ 28 truh lơ 29 blan 7. Tui hăng pô truh pơhiăp Ding jum pơtom hiăp dêh čar Việt Nam, yă Lê Thị Thu Hằng, tal rai čuă Việt Nam mơng Khua ding jum ling tơhan Mi djru pơđĭ tui tơlơi ngă hrŏm dua bơnah, kơplah wah tơhan hăng mơnuih ƀon sang dua bơnah, pơphun ngă lu bruă gah ling tơhan hơmâo kĭ kơplah wah dua Ding jum ling tơhan hăng tơlơi kĭ pơkôl mơng khua mua git gai lŏn ia dua bơnah, gum djru amăng tơlơi ngă hrŏm abih bang Việt Nam - Mi. Hlâo kơ hrơi ơi Lloyd Austin rai pơ Việt Nam, dêh čar Mi hơmâo jao laih 3 klăk liêu vaccine Moderna kơ Việt Nam kiăo tui hơdră djru COVAX. Ơi Lloyd Austin, 67 thun, lĕ sa čô khua tơhan 4 asar pơtŭ ngă bruă amăng tơhan lục quân Mi. Ñu lĕ Khua ding jum ling tơhan klĭ oai kah ƀu hơmâo djơ̆ ôh amăng dêh čar Mi mơng đưm truh ră anai. Ñu hơmâo ruah ngă khua amăng lơ 22/1/2021, kơnong 2 hrơi tơdơi kơ ơi Joe Biden ngă Khua mir sir dêh čar Mi.

Siu H’Mai: Pơblang