VOV4.Jarai - Tŭ ư tơlơi jak iâu mơng  Đại tướng Phan Văn Giang, Khua ding jum ling tơhan dêh čar ta, Grup khua pơ ala ling tơhan pơlir hơbit dêh čar Anglê hăng Bắc Ai-len yua ơi Robert Ben Lobban Wallace, Khua ding jum ling tơhan ngă khua ba jơlan rai čuă dêh čar ta mơng lơ 21 truh lơ 23/7/2021, mơguah lơ 22/7, ƀơi Sang bruă Khua ding jum ling tơhan, Đại tướng Phan Văn Giang, Ding kơna Ding jum kơđi čar, Kơ-iăng khua Ping gah Ling tơhan Dêh čar, Khua ding jum Ling tơhan git gai mông čơkă hăng pơhiăp tom hăng ơi Robert Ben Lobban Wallace hrŏm hăng ƀing khua amăng grup.

Čơkă Khua ding jum ling tơhan pơlir hơbit dêh čar Anglê hăng Bắc Irelan Robert Ben Lobban Wallace

Ƀơi mông ngă bruă, Khua ding jum ling tơhan pơlir hơbit dêh čar Anglê hăng Bắc Ai-len thâo hluh kơ tơlơi pơmin mơng Việt Nam amăng bruă pơsir tơlơi rung răng ia rơsĭ Ngŏ, pơsit tơlơi yôm mơng tơlơi rơngai rô nao rai pơ ia rơsĭ, rơngit adai, dong yua tơlơi pơmin ngă bruă pơpŭ kơ tơlơi phiăn, lăi nao lu hơdôm tơlơi aka ƀu djơ̆ hrŏm kiăng pơsir hăng hơdră pơtom hiăp nao rai mơ-ak, kiăo tui tơlơi phiăn jar kmar. Pơsit hrŏm, hrơi blan rơgao tơlơi rô nao rai kơplah wah dua bơnah hơmâo pơđĭ tui hiam hloh laih, hăng lu tơlơi dưi ngă gah bruă kơđi čar, bơwih ƀong, sĭ mơdrô, boh thâo gru grua, pơtô hrăm.

Siu H’Mai: Pơblang