VOV4.Jarai - Mơguah lơ 11/11, Tui jơlan hơdră jơnum, tơdơi kơ pơđut bruă gah mơnuih mă bruă, tơhan rơka hăng mơnuih mơnam ƀơi mông jơnum lok 2, Khua git gai pơ ala mơnuih ƀon sang hơdai nao bruă tơña hăng lăi glăi tơlơi tơña hăng Khau ding jum pơtô hăng pơjuăt. Hơdôm tơlơi hơmâo ƀing khua lăp đing nao, tơña kơ Khua ding jum pơtô hăng pơjuăt Nguyễn Kim Sơn pơƀut kơ bruă mơ̆ mơnuih ƀon sang glăk lăp đing pơhmư̆ ră anai anun lĕ: anŏ klă mơng bruă pơtô hrăm mơng ataih, anŏ klă mơng hơdrôm hră hrăm phrâo, pơtô rơngiao mông hrăm pơ sang hră, hrăm online. Lăi glăi tơlơi anai, Khua ding jum ơi Nguyễn Kim Sơn brơi thâo, bruă pơtô hăng hrăm mơng ataih amăng internet amăng mông anai aka ƀu phiah hơmâo djơ̆ ôh mơng hlâo yua hnun jing tơnap biă. Tui hăng mrô jŭ yap ƀu djơ̆ 1 klăk 500 rơbâo čô čơđai ƀu hơmâo măi mok hrăm hră ôh mơ̆, sit biă ñu lĕ 1 klăk 800 rơbâo čô čơđai ƀu hơmâo măi či hrăm mơng ataih ôh. Khă hnun, ră anai anom bruă pơtô hrăm glăk gir pơhlôm anŏ klă amăng bruă pơtô hăng hrăm dưm kơnar soh. Khua ding jum ơi Nguyễn Kim Sơn pơhmư̆ tơlơi pơgôp hiăp mơng ƀing khua laih anun ƀuăn amra hơmâo tơlơi git gai lăp djơ̆ amăng hrơi blan pơ anăp.

Siu H’Mai: Pơblang