VOV4.Jarai - Tlam lơ 13/8, Khua ding jum pơtom hiăp Bùi Thanh Sơn jơnum lăng nao rai mơng ataih hăng yă Armida Salsiah Alisjahbana, Kơ-iăng Khua čih pioh Sang gum hơbit djop dêh čar ngă rah Khua čih pioh Jơnum min bơwih ƀong huă - mơnuih mơnam kual Asia - Thái Bình Dương mơng Sang gum hơbit djop dêh čar Việt Nam (ESCAP). Amăng mông jơnum, Khua ding jum ơi Bùi Thanh Sơn lăi pơtong Việt Nam lăng yôm tơlơi rô nao rai ngă hrŏm yôm phăn  hăng ESCAP hăng lăng yôm tơlơi gơgrong mơng ESCAP hơmâo Sang gum hơbit djop dêh čar jao pơtrut pơđĭ kyar bơwih ƀong huă - mơnuih mơnam hơđong kjăp hăng djop mơta amăng kual Asia - Thái Bình Dương. Khua ding jum Bùi Thanh Sơn lăi pơtong Việt Nam amra gum hrŏm kjăp hăng ESCAP kiăng kơ ngă pơgiong tơlơi pơsit anai. Khua ding jum pơtom hiăp Bùi Thanh Sơn rơkâo ESCAP tŏ tui djru Việt Nam amăng thun blan klin Covid-19 glăk hơđuh glăi, biă mă ñu hluai tui kơsem min tong ten hăng rơkâo ba tơbiă hơdôm hơdră pơgang amăng kual glăk guang dar amăng bơwih ƀong sĭ mơdrô hăng hơkrŭ glăi bơwih ƀong huă - mơnuih mơnam amăng hrơi hơmâo klin, hơkrŭ glăi brơi klăk hăng hơđong kjăp.