VOV4.Jarai -  Ƀơi ƀirô mă bruă Ding jum pơtom hiăp dêh čar ta, Khua Ding jum pơtom hiăp dêh čar ta ơi Bùi Thanh Sơn hmâo bơkơtuai amăng telephone hăng Khua git gai Ping gah Kual wai lăng mă pô djuai ania Choang Quảng Tây (Khač) Lộc Tâm Xã. Amăng mông bơkơtuai, ơi Bùi Thanh Sơn pơsit, Ping gah, Kơnuk kơna hăng mơnuih ƀôn sang dêh čar Việt Nam hlâo dơi ha sa lăng yôm pơđĭ kyar ƀing gŏp jê̆ giăm giăng mah, gum hrom abih bang Việt Nam hăng Khač, amăng anun dŏng yua Ding jum, gơnong bruă, tơring čar, ƀôn prong dêh čar Việt Nam kơtưn gum hrom giăng mah hăng Quảng Tây. Gah gum hrom hơdôm hrơi pơ̆ anăp, ơi Bùi Thanh Sơn rơkâo dua bơnah djă pioh bơkơtuai, bưp nao rai ƀơi hơdôm gưl hăng hơdră hơdeč hmar; kơtưn lăi pơthâo tơlơi pơhing, hơdră bruă bơdjơ̆ nao bruă pơgang, pơgăn klin, gum hrom pơgang pơgăn klin ƀơi kual guai lŏn ia; mă yua hơdôm bruă tŭ yua kiăng djă pioh pran đĭ kyar gum hrom bơwih ƀong – sĭ mơdrô, ngă gal brơi kơ gơnam tam Việt Nam blơi mut amăng dêh čar Khač./.

Siu H’ Prăk: Pô pơblang