VOV4.Jarai-Ƀơi Trùng Khánh, dêh čar Khač, Khua ding jum pơtom hiăp ơi Bùi Thanh Sơn hơmâo bưp dua bơnah hăng Kơ-iăng Khua dêh čar, Khua ding jum pơtom hiăp dêh čar Kur, Prak Sokhonn ƀrô djơ̆ tal nao jơnum yôm phara, Khua ding jum pơtom hiăp kual ASEAN hăng Khač laih anun jơnum khua ding jum khul ngă hrom Mekong-Lan Thương tal 6.

Ƀơi mông bưp, Dua čô khua ding jum pơdah pran jua mơak ƀuh tơlơi ngă giăng mah Việt Nam-Kur dŏ djă hnong pơđĭ kyar klă thun blan rơgao, lơ̆m klin kheng Covid hơđuh rai; dua bơnah ăt djă bong bruă brơi pơtom hiăp, bưp nao rai hăng pơđĭ tui boh tŭ yua ngă hrom dua bơnah.

Dua bơnah tŭ ư ngă hrom wai lăng tong ten jơlan guai dêh čar, pơgăn bruă mut tơbiă ƀu găl tơlơi phiăn, laih dơ̆ng ngă gêh găl kơ bruă sĭ mơdrô ƀơi guai dêh čar; bơni kơ bruă pok amăng jang guai dêh čar hăng jar kmar Tân Nam tơring čar Tây Ninh-Mơn Chây, tơring čar Prey Veng mơ̆ng lơ 31/5 rơgao.

Nay Jek: Pô pơblang