VOV4.Jarai-Khua ding jum pơtom hiăp ơi Bùi Thanh Sơn hơmâo pơhiăp telephôn hăng Khua ding jum pơtom hiăp dêh čar Canada, Marc Garneau. Ơi Bùi Thanh Sơn lăi pơtong, Việt Nam lăng yôm dêh čar Canada kơtưn ngă hrom rô nao rai hăng kual ASEAN laih anun Việt Nam; bơni hơơč kơ hơdôm boh tơhnal dêh čar Canada dưi pơgăn laih klin Covid 19; bơni kơ tơlơi djru yôm mơ̆ng Canada pioh kơ Việt Nam pơsir tơlơi truh ƀơi kual Tong krah Việt Nam hăng bong glăi klin kheng covid 19, biă mă ñu ĕp blơi vaccine.

Gah kơ ñu, Khua ding jum pơtom hiăp, Marc Garneau lăi ngă djơ̆ tơlơi ƀuăn djru Việt Nam hăng hơdôm dêh čar dưi tŭ mă vaccine covid 19. Anăp nao hơdor glăi 50 thun hrơi akŏ pơjing bruă pơtom hiăp thun 1973-2023, dua čô khua ding jum tŭ ư kiăng hơmâo hơdră rơđah rơđong hloh pơtrut bruă sĭ mơdrô dua bơnah đĭ truh 8 klai dolar amăng 2 thun pơ anăp, pơsur anom bruă sĭ mơdrô dua bơnah ngă tui hră pơkôl CPTPP, kơtưn ngă hrom gah bruă pơtô hrăm, pok bruă ngă hrom prăk kăk, bơwih ƀong huă hăng mrô, bơblih phrâo pơčeh ia rơgơi tơlơi kơhnâo.

Nay Jek: Pơblang