VOV4.Jarai-Tlam lơ 19/5, Khua ding jum pơtom hiăp, ơi Bùi Thanh Sơn hơmâo pơhiăp telephôn hăng Kơ-iăng Khua dêh čar, Khua ding jum pơtom hiăp dêh čar Thai Lan, ơi Don Pramudwinai.

Dua čô khua ding jum tŭ ư ngă hrom tong ten, pơtrut pơphun klă bruă mă hơdor glăi 45 thun hrơi akŏ pơjing bruă pơtom hiăp Việt Nam-Thai Lan, ăt pơtrut bruă brơi khua mua pơprong dua bơnah bưp nao rai amăng mông gêh gal, pok pơhai tŭ yua ngă tui bruă hơdai gum hrom dua bơnah, amăng anun jơnum khua mua kơnuk kơna hrom tal 4 yua kơ Khua dêh čar dua bơnah git gai, Jơnum min ngă hrom dua bơnah tal 4 gưl Khua ding jum pơtom hiăp, ĕp lăng bruă kơđi čar hrom tal 8 gưl kơ-iăng khua ding jum pơtom hiăp.

Dua čô khua ding jum tŭ ư tañ kĭ pơkôl Hơdră pok pơhai mă bruă, gum hrom tong ten kjăp mơ̆ng thun 2021-2025; ngă tui bruă sĭ mơdrô djru pơtrut rŭ glăi bơwih ƀong huă tơdơi kơ abih klin, kơtưn ba rơnoh prăk sĭ mơdrô dua bơnah pơhrui glăi truh 25 klai dolar Mi, ngă hrom bong glăi hăng klin kheng prong laih anun blơi ia jrao vaccine pơgang rơnuk rơnua, tŭ yua sit nik.

Nay Jek: Pơblang