VOV4.Jarai - Mơguah lơ 20/12, ƀrô ngă lơphet 77 thun hrơi akŏ pơdong Khul ling tơhan Việt Nam, ơi Đinh Tiến Dũng, Ding kơna Ding jum Kơđi čar, Khua git gai Ping gah ƀon prong Hà Nội hơmâo nao čuă jơmư, hơ-ơč kơ khua mua, ling tơhan Puih kơđông tơhan Tư lệnh plơi prong jưh jom.

Khua git gai Ping gah ƀon prong Hà Nội Đinh Tiến Dũng hơ-ơč hmưi kơ Anom bruă tơhan Tư lệnh plơi prong jưh jom.

Pơhiăp ƀơi mông jơnum, Khua git gai Ping gah ƀon prong Hà Nội ơi Đinh Tiến Dũng pơpŭ bơni, hăng hơ-ơč hmưi kơ hơdôm tơlơi dưi ngă, tơlơi gum pơgôp prong mơng khua mua, ling tơhan mơng Anom bruă tơhan Tư lệnh Plơi prong jưh jom amăng thun 2021; hơ-ơč kơ ƀing khua, ling tơhan pơ anai pơtrut tui dong tơlơi rơgơi, pran jua ngă tui, tui gru “Ling tơhan rơnuk Wa Hồ”, “Mơnuih ngă tơhan Plơi prong jưh jom” hơmâo ngă lu bruă hiam, bruă prong hloh, jing anih đăo gơnang, hơđong kơjăp mơng Ping gah, gong gai hăng mơnuih ƀon sang Plơi prong jưh jom. Ƀơi anăp bruă hơmâo klin kheng Covid-19, Khua git gai Ping gah ƀon prong kiăng Anom bruă tơhan Tư lệnh Plơi prong jưh jom prăp lui hơdră ngă bruă klă hloh, ngă hrŏm hăng hơdôm anom bruă, čơkă pơjrao mơnuih ruă.

Siu H’Mai: Pơblang