VOV4.Jarai -  Mơguah lơ 30/9, rơwang bruă tơdrông toa Thủ Thiêm 2 sit nik pơkĕ hrom, tô nao rai dua hang ia gah plơi prong Thủ Đức hăng Quận 1, ƀôn prong Hồ Chí Minh. Nao pơhmư̆ hmâo Ding kơna Ding jum kơđi čar, Khua git gai Ping gah ƀôn prong Hồ Chí Minh ơi Nguyễn Văn Nên, Khua Jơnum min mơnuih ƀôn sang ƀôn prong Phan Văn Mãi hăng khua pơ ala kơ Gơnong bruă, Jơnum min. Pô tuh pơplai rơwang bruă lĕ Sang bruă pơčruh hrom prăk bơwih ƀong tuh pơplai pơdŏng sang dô̆ Đại Quang Minh abih bang prăk tuh pơplai lĕ 4.260 klai prăk, prăk tuh pơplai tui hơdră gum hrom bruă hrom hăng bruă ha jăn (PPP).

Rơwang bruă tơdrông toa Thủ Thiêm 2 ataih rơbêh kơ 1,4km, amăng anun črăn tơdrông toa ataih 886 met hăng 6 glông jơlan rơdêh đuăi. Tơdrông toa dăp tui hơdră hrĕ dăng hăng tơmeh čoh črăn phun dlông 113m. Rơwang bruă tơdrông toa Thủ Thiêm 2 lĕ ring bruă phun amăng tơhnal pơkă hrom pơgang pơgăn klin hăng pơđĭ kyar rah bruă bơwih ƀong - mơnuih mơnam mơng ƀôn prong. Anai lĕ sa amăng mrô ƀiă rơwang bruă dưi hmâo Jơnum min mơnuih ƀôn sang ƀôn prong brơi pơdŏng amăng hơdôm hrơi dô̆ čơlah mơnuih mơnam./.

Siu H’ Prăk: Pô pơblang