VOV4.Jarai -  Ngă tui Jơlan hơdră bưp mơnuih ƀôn sang hlâo Tal jơnum lok 2 Khua pơ ala mơnuih ƀôn sang dêh čar ta tal 15, Khua git gai Ping gah dêh čar ta ơi Nguyễn Phú Trọng bưp mơnuih ƀôn sang hơdôm bôh quận Ba Đình, Đống Đa, Hai Bà Trưng, ƀôn prong Hà Nội, kiăng lăi pơthâo Tơlơi pơkă hlâo jơlan hơdră jơnum hmư̆ hăng lăi glăi hơdôm tơlơi gum pơhiăp mơng mơnuih ƀôn sang.

Khua git gai Ping gah dêh čar ta ơi Nguyễn Phú Trọng bưp mơnuih ƀôn sang ƀôn prong Hà Nội

Lu mơnuih ƀôn sang pơdah pran jua mơ-ak kơ truh kih, bôh tơhnal yôm phăn amăng mông Jơnum mrô 4 mơng Ping gah phrâo pơđut, pơdah pran jua tŭ ư hrom hăng hơdră pơtrun, hơdră bruă mơng Ping gah, Kơnuk kơna kơ bruă mơnuih apăn bruă ngă bruă tañ dưi lăi nao amăng tơlơi pơhiăp pơđut mông Jơnum mơng Khua git gai Ping gah dêh čar ơi Nguyễn Phú Trọng. Pơhiăp amăng mông bưp, Khua git gai Ping gah dêh čar ta ơi Nguyễn Phú Trọng lăi lĕ, klin Covid-19 bơdjơ̆ nao prong biă hăng rŏng lŏn tơnah lăi hrom, amăng anun hmâo dêh čar ta. Truh ră anai, djop bruă mă mơng lŏn ia ăt dô̆ hơnong mơn amăng tơlơi pơgang, pơgăn klin ruă. Khua git gai Ping gah dêh čar ta ơi Nguyễn Phú Trọng čang rơmang pơ̆ anăp anai, wot glông bruă kơđi čar hăng mơnuih ƀôn sang ngă tui dong pran jua gum hrom hơbit, tŭ ư hrom pran jua, pơsit pran prong kiăng yak rơgao tơlơi tơnap, khut khăt ƀu lui raih, tah hơtai ƀơi anăp klin ruă Covid-19. Khua git gai Ping gah dêh čar ta ơi Nguyễn Phú Trọng rơkâo, rim khua pơ ala mơnuih ƀôn sang khom sit nik khua pơ ala ha pran jua, tơpă sit, ƀu pơdơi gir run ngă tui klă bruă dưi jao./.

Siu H’ Prăk: Pô pơblang