VOV4.Jarai - Mơguah lơ 5/1, ƀơi Ƀirô mă bruă Kơnuk kơna, gah yŭ tơlơi git gai mơng Khua dêh čar ơi Phạm Minh Chính, Kơnuk kơna pơphun jơnum lăng nao rai mơng ataih đơ đam dêh čar pok pơhai Klah čun mơng Kơnuk kơna hăng Tơlơi pơtrun pơsit mơng Khua pơ ala mơnuih ƀôn sang dêh čar ta tal 15 kơ kơčăo bruă pơđĭ kyar bơwih ƀong mơnuih mơnam thun 2022.

Nao pơhmư̆ hăng pơhiăp črâo ba amăng mông jơnum, Khua git gai Ping gah dêh čar ta ơi Nguyễn Phú Trọng lăi rơđah, pơ̆ anăp anai Kơnuk kơna khom đing nao ngă tui ba glăi bôh tơhnal Jơlan hơdră hơkrŭ glăi hăng pơđĭ kyar bơwih ƀong – mơnuih mơnam, pơkĕ hrom hăng ngă tui tơhnal pơkă wai lăng nua gơnam tam, pơhlôm hơđong bơwih ƀong prong hăng hơdôm tơlơi ngă hơđong prong bruă bơwih ƀong. Pơplih phrâo dong bruă tuh pơplai bơwih ƀong sĭ mơdrô, pơtrut đĭ kyar tañ hăng kơjăp, sit nik hloh. Khua dêh čar ơi Phạm Minh Chính lăi rơđah, jơnum anai amra đing nao pơblang, pơsit bôh tơhnal ngă tui bruă kơđi čar thun 2021, pơsit hơdôm tơlơi đing nao hlâo hăng tơpă ară črâo tơbiă hơdôm bruă akă dưi ngă, hăng bôh than ba truh, biă ñu bôh than ƀu đing nao kơjăp. Hrom hăng anun, ba tơbiă hơdôm jơlan gah hơkrŭ glăi, bơkơtuai tŏng ten hăng tŭ ư hrom gah tơhnal pơkă, bruă mă, jơlan gah phun kiăng ngă tui bruă kơđi čar yôm phăn, dưi hmâo Ping gah, Kơnuk kơna hăng mơnuih ƀôn sang jao./.

Siu H’ Prăk: Pơblang