VOV4.Jarai - Mơguah lơ 16/8 ƀơi Hà Nội, Grŭp apăn bruă Jơnum min djop djuai ania mơnuih mơnam dêh čar Việt Nam pơphun Jơnum lăng nao rai mơng ataih đơ đam dêh čar pok pơhai Jơlan hơdră bruă mă mơng Jơnum min djop djuai ania mơnuih mơnam dêh čar Việt Nam hăng hơdôm khul grŭp ding kơna ngă tui Tơlơi pơtrun pơsit Jơnum Ping gah đơ đam dêh čar ta tal 13.

Nao pơhmư̆ hăng đĭ pơhiăp črâo ba amăng mông jơnum, Khua git gai Ping gah dêh čar ta ơi Nguyễn Phú Trọng lăi rơđah, kiăng ngă tui khom dưi jơlan gah, bruă mă, tơhnal pơkă phun mơng Tơlơi pơtrun pơsit Jơnum Ping gah đơ đam dêh čar tal 13, ƀu hmâo hơdră hơpă pha ra lĕ ƀing ta khom dưi ngă tui pran kơtang mut hrom mơng abih bang djuai ania pơkĕ hrom hăng pran kơtang rơnuk phrâo gah yŭ tơlơi git gai djơ̆, pơdah rơđah mơng Ping gah. Khua git gai Ping gah dêh čar ta ơi Nguyễn Phú Trọng rơkâo Jơnum min djop djuai ania mơnuih mơnam dêh čar Việt Nam hăng hơdôm khul grŭp ding kơna khom kơtưn pơdŏng hăng hơkrŭ đĭ kơjăp pran jua gum hrom hơbit djuai ania, ngă tui pran jua pơčeh phrâo mơng hơdôm gưl mơnuih ƀôn sang; biă ñu ngă tui pran kơtang pơčeh phrâo prong prin mơng hơdôm gưl mơnuih ƀôn sang. Hrom hăng anun lĕ tơlơi lăng ba truh tơlơi pơmin, čang rơmang hăng bôh tŭ yua sit nik mơng rim gưl mơnuih ƀôn sang./.

Siu H’ Prăk: Pô pơblang