VOV4.Jarai-Amăng tal rai čuă jơmư Việt Nam, mơguah lơ 29/6, Khua git gai Ping gah, Khua mir sir dêh čar Lao, ơi Thongloun Sisoulith hơmâo tŭ jum ơi Đỗ Văn Chiến Khua Jơnum min djop djuai ania mơnuih mơnam Việt Nam hăng khua mua khul ngă giăng mah Việt Nam-Lao, khua mua pơtruh tơlơi pơhiăp Khul khua hơđăp mơnuih rơgơi kơhnâo, djru bruă, ling tơhan mơ̆ng Việt Nam mă bruă pơ dêh čar Lao.

Bơni hơơč kơ tal Jơnum ruah khua ping gah gưl XI dêh čar Lao, Khua Jơnum min djop djuai ania mơnuih mơnam Việt Nam lăi pơtong, tal rai čuă jơmư anai mơ̆ng Khua git gai ping gah, Khua mir sir dêh čar Lao amra pơtrut hloh bruă ngă giăng mah Việt Nam –Lao đĭ tui rơnuk phrâo.

Khua git gai Ping gah, Khua mir sir Lao, ơi Thongloun Sisoulith čang rơmang tơdơi kơ dưi pơgăn klin Covid 19, anom bruă djop djuai ania mơnuih mơnam Việt Nam hăng anom bruă djop djuai ania mơnuih mơnam Lao bưp nao rai, pơčrông sai bruă mă, djă pioh, pơđĭ tui tơlơi ngă giăng mah yôm phara, lăp hăng hơdôm tơlơi tuh drah pơčah asar mơ̆ng rơnuk adơi ayong anong wa tuh rơyuh laih mơ̆ng hlâo kiăng hơkrŭ kơ lŏn ia.

Nay Jek: Pơblang