VOV4.Jarai - Mơguah lơ 29/7, ƀơi Ƀirô mă bruă, Khua mir sir ơi Nguyễn Xuân Phúc tŭ jum ơi Lloyd Austin Khua ding jum ling tơhan dêh čar Mi glăk rai čuă sit nik dêh čar Việt Nam tui tơlơi jak iâu mơng Đaị tướng Phan Văn Giang, Khua ding jum ling tơhan dêh čar ta. Pơ ala brơi Kơnuk kơna hăng mơnuih ƀon sang Việt Nam, Khua mir sir ơi Nguyễn Xuân Phúc pơpŭ bơni kơ dêh čar Mi hơmâo djru brơi Việt Nam vaccine pơgang klin Covid-19; lăng yôm hơdôm boh tơhnal pơčrông sai kơplah wah Khua ding jum ơi Lloyd Austin hăng Khua ding jum ling tơhan Việt Nam ơi Phan Văn Giang; dua bơnah tŭ ư amăng lu boh tơhnal ngă hrŏm yôm phăn pơ anăp anai. Khua ding jum ling tơhan Mi ơi Lloyd Austin ăt pơsit tong Mi amra pơtrut kơtang ngă hrŏm hăng dêh čar Việt Nam kiăng hơkrŭ glăi anŏ sat răm mơng rơnuk blah wang; mơng anun amra ƀu pơdơi pơjing hăng pơtrut pran đăo gơnang nao rai dư bơnah.

Tŭ jum Khua ding jum ling tơhan Mi ơi Lloyd Austin, Khua dêh čar ta hok mơ-ak hăng tal rai čuă Việt Nam mơng Khua ding jum ling tơhan Mi, čang rơmang amra pơtrut rô nao rai ngă hrŏm djop mơta hăng dêh čar Mi hluai tui hơdră ba glăi tơlơi dưi dua bơnah, yua kơ tơlơi rơnuk rơnua, hơđong hăng pơđĭ kyar amăng kual hăng jar kmar. Khua dêh čar ta pơsit tong bruă ngă hrŏm bơwih ƀong huă kơplah wah dua boh dêh čar dŏ lu tơlơi gal kiăng pơđĭ kyar, čang rơmang dua bơnah amra ngă hrŏm kjăp dong pơ anăp anai, biă mă ñu pơtrut amăng bruă dêh čar Mi gal hăng Việt Nam hơmâo lu tơlơi dưi anun lĕ man pơkra anih anom, jơlan glông, tuh pơ alin, apui lơtrik …

Siu Đoan: Pơblang