VOV4.Jarai - Mơguah lơ 22/10, ƀơi ƀôn prong Hải Phòng, Ping gah ling tơhan, Ding jum ling tơhan pơphun mông ngă lơphet pioh hơdor glăi 60 thun hrơi pok jơlan Hồ Chí Minh amăng kual ia rơsĭ (23/10/1961-23/10/2021). Khua git gai Ping gah ơi Nguyễn Phú Trọng nao ngă lơphet hrŏm. Amăng rơnuk blan wang bơkơdong glăi ayăt Mi, tui tơlơi rơkâo ječ ameč amăng bruă djru brơi kual Dơnung, lơ 19/5/1959, Ping gah ling tơhan hăng Ding jum ling tơhan pơsit akŏ pơjing Grup hyu mă bruă yôm phăn (tơdơi anai plih hĭ jing anăn Grup 559), grup anai amra pơdŭ pơgiăng gơnam tam, pơphun ba nao, čơkă ling tơhan, mơnuih apăn bruă mơng kual Kơdư mut nao Dơnung, mơng kual Dơnung nao pơ kual Kơdư.Tơdơi kơ hrơi blan kơsem min, ngă lông lăng hăng prap lui djop mơta, lơ 23/10/1961, Ding jum ling tơhan pơsit akŏ pơjing Grup 759 pơdŭ pơgiăng gơnam amăng kual ia rơsĭ. Bruă akŏ pơjing grup 759 hrŏm hăng pok jơlan găn nao rai mơng Kơdưk nao Dơnung kơtuai tui jơlan amăng kual ia rơsĭ lĕ bruă yôm phiăn amăng bruă pơgiăng nao gơnam djru brơi kual Dơnung hăng anăn jơlan Hồ Chí Minh. Amăng hơdôm thun blan laih rơgao jơlan Hồ Chí Minh amăng kual ia rơsĭ lĕ tơlơi pơ-ư pơ-ang mơng khul ling tơhan hăng mơnuih ƀon sang Việt Nam, lĕ tơlơi hing ang pơdah pran sông kơtang mơng bruă ngă hơkrŭ, tơlơi thâo thăi, khin hơtai, gir run tuh rơyuh pran jua kiăng kơ pơklaih rơngai lŏn ia ta.

Siu Đoan: Pơblang