VOV4.Jarai - Khua git gai Ping gah ơi Nguyễn Phú Trọng ba tơbiă tơlơi iâu pơthưr mơ-it abih bang mơnuih apăn bruă, ling tơhan, mơnuih ƀon sang đơ đam dêh čar ta hăng pơ tač rơngiao kơ bruă pơgang klin Covid-19. Amăng hră mơ-it, Khua git gai Ping gah lăi pơtong: “Ră anai, klin Covid-19 glăk ngă tơnap tap, lar hyu kơtang, ngă bơbeč sat nao tơlơi suaih pral laih dong ngă djai lu mơnuih, bơbeč kơtang nao bruă bơwih ƀong huă - mơnuih mơnam, hăng djop mơta amăng tơlơi hơdip mơda. Hăng pran gơgrong “pơgang klin kar hăng blah ayăt”, pơgang rơlơi suaih pral, tơlơi hơdip kơ ană mơnuih lĕ yôm hloh, pơ ala brơi Ping gah hăng Kơnuk kơna, ñu abih pran jua iâu pơthưr Ping gah, abih bang mơnuih ƀon sang, ling tơhan hăng mơnuih ƀon sang pơ tač rơngiao: Ƀing ta hơmâo gir run laih ră anai kiăng gir ƀiă dong; hơmâo gum pơgôp ră anai pơgôp lu ƀiă dong; gơgrong abih pran ră anai gơgrong kơtang tui dong; djop djuai ania jing sa, ha pran sa jua, Kơnuk kơna, djop gưl, djop gơnong bruă ĕp hơdră pơgang hĭ klin, khŏm pơgăn hĭ abih, anăm brơi lar hyu kơtang amăng mơnuih mơnam. Ñu rơkâo djop gưl, khul grup, Kơnuk kơna, gơnong bruă git gai bruă pơgang klin Covid-19 mơng gơnong glông truh pơ ƀon lan kiăng khut khăt ƀiă dong amăng bruă git gai; đing nao mơnuih mă bruă, pơpha hrơi mông mă bruă; gơgrong pơgang hŭi kơ klin hơđuh đĭ kơtang ƀu hmao thâo; ječ hmar, thâo pơčeh phrâo kiăng ngă tŭ yua hơdôm bruă yôm phun anai …

Ñu đăo gơnang, đơ đam dêh čar lơ̆m hơmâo tơlơi gum pơgôp abih pran mơng Ping gah, abih bang mơnuih ƀon sang, hrŏm hăng tơlơi gum djru mơng mơnuih ƀon sang pơ tač rơngiao hăng hơdôm dêh čar pơkŏn, dêh čar ta amra pơgang hĭ klin Covid-19 hăng khŏm pơgăn hĭ, djơ̆ hăng tơlơi gir run mơng abih bang mơnuih ƀon sang yua kơ rŏng lŏn tơnah hơđong, rơnuk rơnua, ngă giang mah, ngă hrŏm hăng pơdrong asah, djơ̆ hăng gru grua sông kơtang hing ang mơng dêh čar ta, djop djuai ania ta”.

Siu Đoan: Pơblang