VOV4.Jarai - Tŏ tui hơdôm hrơi bưp mơnuih ƀon sang tơdơi kơ jơnum lok 2, Khua pơ ala mơnuih ƀon sang dêh čar tal XV, mơguah lơ 26/11, Khua git gai Ping gah ơi Nguyễn Phú Trọng hrŏm hăng khua mua pơ ala mơnuih ƀon sang gah anom bruă plĕ hră mrô 1, Khua mua pơ ala mơnuih ƀon sang ƀôn prong Hà Nội hơmâo mông bưp mơnuih ƀon sang ƀơi hơdôm kuận Ba Đình, Đống Đa hăng Hai Bà Trưng, mông bưp pơphun ƀơi anăp hrŏm hăng lăng nao rai mơng atai hăng 56 boh phường amăng 3 boh kuận hăng 1.225 čô mơnuih ƀon sang, kiăng kơ lăi pơthâo boh than mơng jơnum lok 2 Khua pơ ala mơnuih ƀon sang dêh čar tal XV hơmâo pơphun amăng hrơi blan tơnap tap, ƀing khua mua mă bruă hăng pran jua gơgrong hloh hăng ba glăi tơlơi tŭ ư hrŏm. Biă mă ñu lĕ amăng pơplih phrâo bruă mă amăng Ƀirô Khua pơ ala mơnuih ƀon sang dêh čar. Kơ bruă pơgang klin Covid-19, mơnuih ƀon sang rơkâo Khua pơ ala mơnuih ƀon sang dêh čar, Kơnuk kơna, djop khul grup, ding jum, gơnong bruă kơtưn tuh pơ alin brơi gơnong bruă ia jrao ƀơi ƀon lan, bruă pơgang pơgăn klin kman; akŏ pơjing hăng tŭ ư hrŏm mă yua boh thâo măi măi amăng đơ đam dêh čar amăng pơgang klin Covid-19. Tui hăng Khua git gai Ping gah ơi Nguyễn Phú Trọng, kiăng hơdôm tơlơi pơsit mơng Ƀirô Khua pơ ala mơnuih ƀon sang dêh čar dưi mă yua sit nik, djop anom bruă amăng Kơnuk kơna kiăng kơ tañ pok pơhai ngă tui klă hloh hơdôm tơlơi phiăn, tơlơi pơsit phrâo ba tơbiă; tŏ tui pơplih phrâo, hrưn đĭ klă dong, tŭ yua amăng bruă mă, đing nao bruă pel ĕp, lăng glăi kiăng tŏ ngă tui hơdôm anŏ klă hăng pơsir hĭ hơdôm anŏ aka ƀu klă.

Siu Đoan: Pơblang