VOV4.Jarai - Tom brơi lơ 19/11, ƀơi Sang bruă Ping gah kơnuk kơna, Khua git gai Ping gah ơi Nguyễn Phú Trọng git gai jơnum Ding jum kơđi čar, Khul khua apăn bruă ping gah sem lăng, bơtơhmal ƀing khua ping gah Ding jum ia jrao, khua mua ping gah mơng Jơnum min mơnuih ƀon sang tơring čar Hà Nam rơwang thun 2016-2021, hăng sa, dua čô lĕ ƀing khua git gai, khua hơđăp mơng Ding jum ia jrao hăng mơng tơring čar Hà Nam. Pơtŏng lăng anŏ soh glăi, tơlơi thâo pơmin glăi tơlơi soh, thâo pơhaih mă pô, pơsir hĭ tơlơi soh sat gơñu ngă, hơdôm tơlơi gum pơgôp mơng rim anom bruă ping gah hăng mơng rim čô mơnuih dong, Ding jum kơđi čar pơsit jăm ƀuah pơhŭi hlâo hăng Khua mua ping gah Ding jum kơđi čar rơwang thun 2016-2021; bơtơhmal hăng tơlơi pơhŭi kiăng răng kơđiăng lui, laih dong brơi pơdơi bruă Khua grup wai lăng tơlơi suaih pral kơ ƀing khua Kơnuk kơna hăng yă Nguyễn Thị Kim Tiến. Khul khua apăn bruă ping gah pơsit bơtơhmal jăm ƀuah hăng Grup khua ping gah Jơnum min mơnuih ƀon sang tơring čar Hà Nam rơwang thun 2016-2021; brơi tơbiă mơng Ping gah hăng ơi Trương Quốc Cường; bơtơhmal pơhŭi hlâo hăng ơi Nguyễn Xuân Đông; brơi pơdơi ngă ding kơna khua apăn bruă git gai Ping gah tơring čar Hà Nam rơwang thun 2020-2025 hăng ơi Đinh Văn An.

Siu H’Mai: Pơblang