VOV4.Jarai-Lơ 24/8, ƀơi sang bruă ping gah dêh čar, ơi Nguyễn Phú Trọng Khua git gai Ping gah dêh čar git gai ta jơnum hăng khul khua mua phun amăng bruă pơgang klin Covid 19 dêh čar. Nao jơnum hrom, hơmâo ơi Nguyễn Xuân Phúc Khua mir sir, ơi Phạm Minh Chính, Khua dêh čar, ơi Vương Đình Huệ, Khua git gai pơ ala mơnuih ƀôn sang dêh čar, khua gum bruă git gai ping gah dêh čar ơi Võ Văn Thưởng, Khua tơhan krên dên gah kông an ơi Tô Lâm, Khua ding jum kông an.

Ƀơi mông jơnum, Khua git gai ping gah ơi Nguyễn Phú Trọng lăi, anai lĕ mông jơnum ječ ameč biă mă yua klin kheng ƀă hyu kơtang tit ră anai. Khua git gai ping gah dêh čar bơni kơ ƀing dŏ mă bruă gah ia jrao pơ anăp adih, wơ̆t tơhan kông an, ling tơhan blah ngă, djop ding jum, anom bruă dêh čar hăng tơring čar, ƀôn prong kiăng lăi abih glông bruă kơđi čar hơmâo ngă hrom soh, kiăng khut khăt pơgăn klin, mơnuih ƀôn sang dong yua biă mă.

Mah hnun, Khua git gai ping gah dêh čar ăt pơčrâo rơđah tơlơi dŏ kơƀah, bruă mă sư̆ rơbư̆, tăp năng ƀơi lu tơring čar ăt dŏ ngă amưng amăng bruă pơhlôm, pơgang klin; hăng pran jua khom hơđong ƀu dưi hŭi bral hơngal ƀudah hăt he ôh, Khua git gai ping gah dêh čar ta rơkâo, Kơnuk kơna, djop ding jum anom bruă ăt lăng nao pơ anăp adih, lăi lui hlâo tơlơi pơhing klin či truh hăng pok pơhai ngă bruă pơgăn klin, tŭ ư sa pran jua, pơpha bruă mă tong ten djơ̆ rơ-ua, djơ̆ bruă, djơ̆ pô glăm ba hlom bom kiăng dưi pơgăn klin kheng pơ anăp anai.

Nay Jek: Pơblang