VOV4.Jarai - Lơ 11/8 ƀơi Ƀirô Kơnuk kơna, pơphun jơnum lăng nao rai mơng ataih đơ đam dêh čar tal blung a mơng Kơnuk kơna rơwang thun 2021-2026 pok pơhai ngă tui Tơlơi pơsit mơng Jơnum Ping gah đơ đam dêh čar tal 13 hăng Tơlơi pơsit mơng Khua pơ ala mơnuih ƀon sang dêh čar tal XV kơ bruă pơđĭ kyar bơwih ƀong huă mơnuih mơnam 5 thun rơwang thun 2021-2025. Khua git gai Ping gah ơi Nguyễn Phú Trọng hơmâo nao jơnum hăng đĭ pơhiăp amăng mông jơnum tal anai.

Khua git gai Ping gah lăi rơđah, Jơnum Ping gah đơ đam dêh čar tal XIII hơmâo pơphun hiam klă, hơmâo tơlơi tŭ ư hrŏm lơ̆m ba tơbiă hơdră pơjing, pơđĭ kyar hăng wai pơgang lŏn ia, amăng anun hơmâo hơdră pơđĭ kyar bơwih ƀong huă - mơnuih mơnam 10 thun 2021-2030, anăp nao thun 2045, ba lŏn ia ta jing dêh čar pơđĭ kyar hơmâo prăk pơhrui tui akŏ mơnuih lu ƀiă laih dong anăp nao hơdră bruă, bruă jao amăng pơđĭ kyar bơwih ƀong huă - mơnuih mơnam 5 thun 2021-2025. Kiăng kơ ngă pơgiong hơnong pơkă , bruă jao ba tơbiă, Khua git gai Ping gah ơi Nguyễn Phú Trọng rơkâo, Kơnuk kơna rơwang thun 2021-2026 kiăng tŏ tui pran kơtang, ngă klă dong tui gru grua hing ang, hơdôm boh than dưi ngă prong prin hăng hơdôm tơlơi găn rơgao yôm phăn mơ̆ Kơnuk kơna dưi ngă amăng djop rơnuk; gir run kơtang ƀiă dong amăng thun blan pơplih phrâo, hrưn đĭ klă dong, tŭ yua amăng bruă mă amăng rơwang pơđĭ kyar phrâo pơ anăp.

Siu Đoan: Pơblang