VOV4.Jarai - Lơ 20/12, ƀơi Hà Nội pơphun Jơnum Ping gah kông ang dêh čar. Git gai mông jơnum, Khua git gai Ping gah ơi Nguyễn Phú Trọng brơi thâo, hăng gơnong bruă kông ang thun 2021 lĕ thun glêh tơnap, samơ̆ ăt pơđŏm glăi lu tơlơi hiam, bruă mă klă. Tui tơlơi git gai mơng Ping gah, wai lăng, črâo ba mơng Kơnuk kơna, abih bang tơhan kông ang hơmâo pơgiong djop mơta bruă amăng thun anai, amăng anun hơmâo pơgiong klă hloh anun lĕ: bruă pơtom hiăp, bruă pơtô ba mơnuih ƀon sang amăng hrơi blan bưp tơnap tap; mut hrŏm, ngă tŭ yua amăng bruă pơgăn hưp ƀong kông ngăn, tơlơi ngă soh.

Khua git gai Ping gah ơi Nguyễn Phú Trọng pơhiăp amăng mông jơnum

Lăi nao kơ bruă mă pơ anăp anai, Khua git gai Ping gah ơi Nguyễn Phú Trọng rơkâo, Ping gah kông ang dêh čar, tơhan kông ang tŏ tui djă pioh hơdôm bruă dưi ngă, gơgrong kiăo tui lăng, tañ pơsir hĭ djop mơta bruă. Prap lui hơdră bruă kiăng pơsir hĭ pơhlôm rơnuk rơnua brơi hơdôm mông jơnum pơƀut yôm phăn amăng dêh čar.

Siu Đoan: Pơblang