VOV4.Jarai-Mơguah lơ 23/5, Khua git gai Ping gah, ơi Nguyễn Phú Trọng nao plĕ hră ruah khua pơ kơthung plĕ hră mrô 58 jơlan Nguyễn Du, kuân Hai Bà Trưng, Hà Nội. Lăi glăi tơlơi tơña mơ̆ng lu mơnuih čih tơlơi pơhing amăng dêh čar hăng tač rơngiao tơdơi kơ plĕ hră ruah khua, Khua git gai Ping gah ơi Nguyễn Phú Trọng pơdah pran jua čang rơmang kah hăng mơnuih plĕ hră ruah khua amăng dêh čar mơ̆n, abih bang ƀing pơ ala mơnuih ƀôn sang dêh čar tal XV hăng ƀing pơ ala mơnuih ƀôn sang djop gưl dưi ruah đĭ tal anai, amra abih pran jua yua kơ lŏn ia, mă bruă kơ mơnuih ƀôn sang, ngă djop bruă glăm ba, bruă khom ngă mơ̆ng ta pô djơ̆ hăng Phiah phiăn dêh čar laih anun tơlơi phiăn pơtrun.

Boh nik ñu khom tong ten hăng dêh čar, hăng mơnuih ƀôn sang, hăng phiah phiăn lŏn ia Cộng hoà xã hội chủ nghiã Việt Nam, ngă tui djơ̆ tơlơi pơkă bruă mă mơ̆ng sa čô mơnuih ngă pô pơ ala yua mơnuih ƀôn sang đăo kơnang ruah đĭ, pơ ala kơ mơnuih ƀôn sang ngă hrom wai lăng bruă kơnuk kơna, wai lăng mơnuih mơnam.

Khua git gai ping gah ơi Nguyễn Phú Trọng lăi pơtong: tal ruah khua anai, pơphun tŭ yua hiam klă, akŏ pơjing rai hrơi mơak kơ abih bang mơnuih ƀôn sang, jing hrơi jơnum prong kơ lŏn ia ta.

Nay Jek: Pơblang