VOV4.Jarai - Lơ 10/9, Khua git gai Ping gah ơi Nguyễn Phú Trọng, Khua anom git gai dêh čar kơ brưa pơgăn tơlơi hưp ham ƀong kông ngăn kơnuk kơna git gai jơnum mơng Ding jum kơđi čar pơgôp hiăp kơ hơdră bruă “Pơplih pơkra, pơhrua tui tơlơi dưi ngă, bruă kiăng ngă mơng Anom git gai bruă Kơnuk kơna kơ pơgăn hưp ham ƀong kông ngăn” či git gai bruă pơgang, pơgăn tơlơi hưp ham ƀong kông ngăn hăng tơlơi soh glăi hơmâo amăng hrơi blan pơ anăp. Tơdơi kơ hmư̆ khua pơ ala Anom bruă Nội chính Kơnuk kơna - Anom bruă git gai phun mơng Khul git gai lăi pơthâo hơdôm tơlơi hơmâo mơng Hră pơdah pơƀuh mơng Kơčăo bruă, Ding jum kơđi čar bơkơtuai hăng tŭ ư soh kơ hơdôm tơlơi hơmâo mơng Kơčăo bruă, Khua git gai Ping gah ơi Nguyễn Phú Trọng lăi, tơlơi yôm phun kiăng git gai mơng Anom bruă git gai Dêh čar pơgăn hưp ham ƀong kông ngăn, tơlơi soh sat amăng hrơi blan pơ anăp lĕ git gai bruă pơgang, pơgăn hưp ham ƀong ngă drăp kơnuk kơna, pơgăn tơlơi pơmin soh glăi, tơlơi hơdip ƀu hiam amăng ƀing khua, mơnuih ping gah, mơnuih mă bruă, blung hlâo ƀing khua, mơnuih wai lăng djŏp gưl amăng anom bruă čar. Tui hăng Khua git gai Ping gah, bruă Ding jum kơđi čar pơsit pơplih, pơhrua tui tơlơi dưi ngă, bruă kiăng ngă mơng Anom git gai dêh čar pơgăn hưp ham kông ngăn lĕ či git gai pơgăn tơlơi hưp ham ƀong kông ngăn wơ̆t hăng tơlơi soh sat, pơdah pơƀuh tơlơi gir run khŏm ngă mơng Ping gah, Kơnuk kơna amăng bruă pơgăn hưm ham ƀong kông ngă kơnuk kơna, ƀu pơdơi pơdă, ngă hơdjă hiam amăng tơlơi pơmin mơnuih mă bruă, mơnuih ping gah, djơ̆ hăng tơlơi kiăng, tơlơi đăo gơnang mơng mơnuih ƀon sang hăng tơlơi git gai mơng Ping gah.

Siu H’Mai: Pơblang