VOV4.Jarai-Tlam lơ 15/7, ƀơi sang bruă ping gah dêh čar, ơi Nguyễn Phú Trọng Khua git gai ping gah dêh čar hơmâo pơhiăp telephôn bơkơtuai hăng Khua mir sir dêh čar Hàn Quốc ơi Moon Jae In.

Khua mir sir Hàn Quốc, ơi Moon Jae In lăi, lăng yôm bruă ngă giăng mah hăng Việt Nam; lăi pơtong Việt Nam jing bơnah ngă hrom yôm hăng Jơlan hơdră anăp nao pơ dơnung mơ̆ng Hàn Quốc; brơi thâo dơ̆ng, Hàn Quốc amra djru hăng ngă hrom Việt Nam amăng bruă pơhlôm, pơgang klin Covid 19; čang rơmang ngă hrom lu hloh dua bơnah dêh čar amăng lu bruă bơwih ƀong huă, pơtom hiăp, rơnuk rơnua, hơđong dêh čar, kiăng pơđĭ rơnoh prăk sĭ mơdrô nao rai dua bơnah tañ hơmâo 100 klai dolar, ba tơlơi ngă giăng mah Hàn Quốc-Việt Nam pơđĭ kyar phrâo dơ̆ng, anăp nao hơdor glăi 30 thun hrơi akŏ pơjing bruă giăng mah amăng thun 2022.

Dua čô khua ăt tŭ ư ngă hrom lu bruă, amăng anun pơtrut ngă hrom pơhlôm pơgang klin hăng djru ia jrao vaccine pơgang covid 19, ngă kjăp tui bruă giăng mah amăng ping gah, khua pơ ala mơnuih ƀôn sang dêh čar hăng hlăk ai dua bơnah dêh čar, ngă atur kjăp kơ bruă rô nao rai mơ̆ng mơnuih ƀôn sang dua bơnah Việt Nam-Hàn Quốc pơđĭ kyar hloh.

Nay Jek: Pơblang