VOV4.Jarai-Mơguah lơ 20/7, Khua git gai ping gah ơi Nguyễn Phú Trọng hrom hăng ƀing khua mua ping gah, kơnuk kơna nao pơhmư̆ jơnum hrom lok sa, khua mua pơ ala mơnuih ƀôn sang dêh čar tal XV, dưi pơphun prong biă mă ƀơi anih jơnum prong Diên Hồng či plơi prong jưh jom Hà Nội.

Đĭ pơhiăp ƀơi mông jơnum, Khua git gai ping gah ơi Nguyễn Phú Trọng rơkâo, ƀing pơ ala mơnuih ƀôn sang kiăng djă kjăp tơlơi gơgrong, bruă mă mơ̆ng pô amăng bruă čih pơkra tơlơi phiăn, bruă mă tui tơlơi phiăn pơtrun pioh ngă bruă kơ dêh čar, bơwih brơi bruă bơwih ƀong huă mơnuih mơnam, pơgang tơlơi rơnuk rơnua hơđong, djru bruă pơtom hiăp dêh čar.

Pơtrut tui hnong mă bruă hăng pơđĭ tui boh tŭ yua čih pơkra hră tơlơi phiăn pơtrun; tañ čih pơkra glông tơlơi phiăn dêh čar pơkă djop akiăng bruă mă, sa hnong, tŭ yua, djơ̆ hăng anŏ kiăng bruă mă rĭm hrơi.

Jing sang bruă pơ ala mơnuih ƀôn sang prong hloh, anom bruă hơmâo tơlơi dưi dlông hloh mơ̆ng lŏn ia Cộng hoà xã hôị chủ nghiã Việt Nam, Khua git gai ping gah dêh čar rơkâo ƀing khua mua pơ ala mơnuih ƀôn sang dêh čar khom djă bong kjăp hăng hrăm tui tơlơi thâo thăi găn rơgao mơ̆ng 75 thun rơgao, ăt khom bơblih phrâo lăp djơ̆, tŭ yua, hiam klă hloh bruă mă kơđi čar lŏn ia amăng rơnuk phrâo.

Nay Jek: Pơblang