VOV4.Jarai - Tom brơi, Khua git gai Ping gah ơi Nguyễn Phú Trọng pơphiăp telephôn hăng Khua git gai Ping gah ƀôn prong Hồ Chí Minh Nguyễn Văn Niên kiăng kơ pơčrông lô kơ bruă pơgang klin Covid-19. Mah aka ƀu nao tơl ƀôn prong, samơ̆ hơdôm hrơi laih rơgao Khua git gai Ping gah dêh čar lêng kơ pơ alum pran jua, đing nao bruă pơgang klin amăng ƀôn prong Hồ Chí Minh kah hăng hơdôm tơring čar kual Dơnung. Khua git gai Ping gah mơ-it tơlơi tơña bla, pơsur Ping gah, gong gai hăng mơnuih ƀon sang ƀôn prong Hồ Chí Minh hơmâo gir run abih pran amăng pơgang klin Covid-19 amăng rơbêh 2 blan laih rơgao. Khua git gai Ping gah lăng yôm, pơpŭ bơni ƀing mơnuih ba gru amăng pơgang klin, ƀu hŭi tơnap tal glêh glar kiăng kơ djru abih pran pơgang brơi tơlơi suaih pral kơ mơnuih ƀon sang, laih dong mơ-it tơlơi pơpŭ bơni kơ mơnuih ƀon sang, ƀing rơgơi kơhnâo, ƀing apăn bruă, ƀing mơnuih čơmah … hơmâo pơgôp prong prin hrŏm hăng Ping gah, gong gai, mơnuih ƀon sang ƀôn prong gum tơngan hrŏm pơgang klin. Amăng mông pơhiăp telephôn Khua git gai Ping gah ơi Nguyễn Phú Trọng sa wŏt dong pơtă ƀôn prong Hồ Chí Minh gir run dong, thâo gum pơgôp, gir abih pran jua dong.

Siu Đoan: Pơblang