VOv4.Jarai - Mơguah lơ 17/6, ƀơi Ƀrô Ding jum ling tơhan, Ping gah ling tơhan dêh čar rơwang thun 2020-2025 pơphun jơnum tal blung a tui tơlơi git gai mơng Khua git gai Ping gah ơi Nguyễn Phú Trọng, Khua čih pioh Ping gah ling tơhan lăi pơthâo Tơlơi pơsit mơng Ding jum kơđi čar črâo brơi bruă ƀing khua mua amăng Ping gah ling tơhan, Khul apăn bruă Ping gah ling tơhan dêh čar rơwang thun 2020-2025, hluai tui hră lăi pơthâo bruă git gai, črâo ba amăng bruă ling tơhan amăng 6 blan laih rơgao, hăng pơsit bruă mă pơ anăp dong. Nao jơnum hrŏm hơmâo Khua mir sir ơi Nguyễn Xuân Phúc, Khua dêh čar Phạm Minh Chính, Khua apăn bruă Ping gah Võ Văn Thưởng, Thượng tướng Phan Văn Giang, Khua ding jum Ling tơhan, hrŏm hăng ƀing Ding kơna Ding jum kơđi čar, Khua apăn bruă Ping gah, khua mua sa, dua Ding jum, gơnong bruă, anom bruă bruă gah gơnong glông. Đĭ pơhiăp amăng mông jơnum, Khua git gai Ping gah ơi Nguyễn Phú Trọng rơkâo, Ping gah ling tơhan amăng rơwang mă bruă anai kiăng gơgrong abih pran, tŏ tui kjăp, tơpă sit amăng bruă mă, thâo gum pơgôp, mut hrŏm, ngă tui tơlơi pơkă, git gai brơi lăp djơ̆, ngă pô, pơjing Khul ling tơhan kĕ phĭ hăng lŏn ia, tui Ping gah, kơnuk kơna hăng mơnuih ƀon sang, biă mă ñu pơjing Pingt gah ling tơhan mă bruă tơpă sit, ba gru hăng git gai ling tơhan dưi ngă pơgiong djop mơta bruă hơmâo jao kiăng kơ tŏ tui djă pioh rup rap hiam klă mơng ling tơhan rơnuk Wa Hô.

Siu Đoan: Pơblang