VOV4.Jarai-Tlam lơ 15/12, ƀơi sang bruă ping gah dêh čar, jơnum prong biă mă jao tơlơi apah bơni yôm kơ ơi Nguyễn Phú Trọng, Khua git gai ping gah dêh čar Việt Nam hăng tơlơi bơni anăn Lenin mơ̆ng khua mua ping gah Cộng sản Nga. Ơi Leonit Khalasnikov, Kơ-iăng khua ping gah Cộng sản dêh čar Nga, Khua jơnum min djop bruă mă amăng kual mut hrom hăng hơdôm dêh čar pơklaih rơngai, pơlir hơbit ASIA hăng Mi kô̆ laih anun mơnuih ƀôn sang Nga pơ dêh čar tač rơngiao mơ̆ng anom bruă Duma dêh čar Nga, pơ ala kơ Ping gah Cộng sản dêh čar Nga jao tơlơi bơni yôm kơ ơi Nguyễn Phú Trọng Khua git gai ping gah Việt Nam, sa tơlơi apah bơni yôm prong hloh mơ̆ng Ping gah dêh čar Nga hăng hơdôm dêh čar rơnuk Liên Xô hơđăp.

Đĭ pơhiăp ƀơi mông jơnum, ơi Nguyễn Phú Trọng bơni kơ Ping gah Cộng sản dêh čar Nga hơmâo bơnŭ bơni kơ ñu tơlơi apah bơni yôm djă anăn Lenin hing ang. Khua git gai ping gah ơi Nguyễn Phú Trọng lăi rơđah, Ping gah dêh čar Việt Nam mă jơlan hơdră pơtô djơ̆ atur mơ̆ng Mak-Lenin, tơlơi pơmin Hồ Chí Minh ngă atur kơ tơlơi pơmin bruă mă, ngă anŏ pơčrâo jơlan mă bruă, akŏ pơdong, wai pơgang hăng pơđĭ kyar lŏn ia, kjăp phik kiăo tui jơlan dêh čar đĭ nao pơ chủ nghiã xã hội, mơnuih mơnam ngă khua pô.

Ơi Nguyễn Phú Trọng ăt lăi, Ping gah Cộng sản Nga hăng hơdôm bơnah ngă hrom  mơ̆ng dêh čar Nga ăt ngă kjăp tui, kơtưn bruă rô nao rai giăng mah hlom bom Việt Nam-Nga laih anun tơlơi ngă giăng mah mơak klă kơplah wah mơnuih ƀôn sang dua bơnah.

Nay Jek: Pơblang