VOV4.Jarai - Pơhiăp ƀơi mông ngă bruă hăng Anom jŭ yap prăk kơnuk kơna amăng tlam lơ 12/8, Khua git gai pơ ala mơnuih ƀon sang ơi Vương Đình Huệ kiăng, tơlơi yôm thun 2022 mơng Anom bruă jŭ yap prăk kơnuk kơna lĕ lăi pơthâo glăi bruă pơkrem, pơgăn prai prăk kơnuk kơna mơng thun 2016 truh thun 2021 amăng bruă prăk kơnuk kơna, kông ngăn pơtâo čuah, lŏn tơnah. Bơni kơ bruă mă mơng Anom jŭ yap prăk kăk kơnuk kơna amăng hrơi blan rơgao, ơi Vương Đình Huệ lăi, Anom bruă jŭ yap prăk hơmâo lăng tui tơlơi ngă bruă mơng rŏng lŏn tơnah, răng kơđiăng hơdôm tơlơi klă, tơlơi aka ƀu klă, mă yua lăp djơ̆ amăng dêh čar Việt Nam, bruă jŭ yap jai hrơi klă tui, jing anom bruă wai lăng ngăn drăp kơnuk kơna tơpă sit. Hrơi blan pơ anăp, Khua git gai pơ ala mơnuih ƀon sang ơi Vương Đình Huệ kiăng, khua mua, mơnuih Ping gah mơng Anom jŭ yap prăk kiăng hơmâo hơdră ngă bruă pơđĭ tui tơlơi rơgơi, tŭ yua amăng bruă mă, kah pơpha bruă mă rơđah rơđông truh thun 2030, kiăo tui tơlơi pơtrun Jơnum Ping gah dêh čar tal 13 hăng hơdôm tơlơi pơčrâo trun bơdjơ̆ nao amăng 5 thun pơ anăp.

Siu H’Mai: Pơblang