VOV4.Jarai - Ƀơi plơi prong jưh jom Viên, dêh čar Áo, ơi Vương Đình Huệ, Khua git gai pơ ala mơnuih ƀon sang dêh čar hơmâo mông bưp 6 čô Khua anih jưh Việt Nam ƀơi kual Mi Kô̆ kah hăng: Khua anih jưh Việt Nam ƀơi dêh čar Séc, Khua anih jưh Việt Nam ƀơi Slovakia; Khua anih jưh Việt Nam ƀơi Hungary; Khua anih jưh Việt Nam ƀơi Ba Lan; Khua anih jưh Việt Nam ƀơi Áo ngă rah khua anih jưh ƀơi Slovenia hăng Khua anih jưh Việt Nam ƀơi dêh čar Đức. Ƀơi mông bưp, ƀing khua anih jưh hơmâo lăi pơthâo tơlơi hơdip mơng mơnuih ƀon sang Việt Nam ƀơi hơdôm boh dêh čar anai. Lăp đing nao, yua klin Covid-19 ƀơi kual Mi Kô̆ kơtang biă amăng thun 2020, yua hnun neh met wa bưp tơnap tap mơn amăng bruă bơwih ƀong hăng amăng tơlơi hơdip.

Ƀing khua anih jưh ăt lăi mơn, mơnuih ƀon sang Việt Nam pơ hơdôm boh dêh čar anai thâo hluh kơ bruă pơgang klin Covid-19, thâo pap kơ plơi pla lŏn ia ta, djru prăk blơi vaccine pơgang klin Covid-19, djru ba mơnuih ƀon sang pơ anih hơmâo tơlơi truh lŏn adai ngă. Mơnuih ƀon sang ƀơi dêh čar Séc hơmâo djru prăk blơi vaccine lĕ 1 klai 500 klăk prăk, mơnuih ƀon sang ƀơi Đức djru 50 rơbâo Euro. Khua git gai pơ ala mơnuih ƀon sang dêh čar ơi Vương Đình Huệ rơkâo kiăng ƀing Khua anih jưh lăng ba dong tơlơi hơdip mơnuih bon sang, kiăng ƀing khua ĕp jơlan djru, pôr pơthâo amăng djŏp plang pơtruh nao rai, wơ̆t hăng mă mơng prăk pơhrui rơbêh, pơhiăp tom ƀudah blơi vaccine pơgang klin Covid-19.

Siu H’Mai: Pơblang