VOV4.Jarai-Pơhiăp pơjưh hĭ mông jơnum Bơkơtuai Bơwih ƀong huă Việt Nam thun 2021, Khua git gai pơ ala mơnuih ƀon sang dêh čar ơi Vương Đình Huệ lăi, tơlơi kiăng ngă djơ̆ hrŏm, hơmâo abih bang tŭ ư, hơmâo lăi nao lu ƀơi mông Jơnum bơkơtuai lĕ ƀing ta khŏm gir mă pô, pơmin mă pô, yak rơbat hăng tơkai ta pô, ƀu pơdơi pơdă ôh, khŏm pơplih na nao tơlơi apăn bruă wai lăng dêh čar ăt kah hăng wai lăng anom bơwih ƀong; gum hrŏm, ƀu kơnong gum pơgôp amăng dêh čar ta đôč ôh mơ̆ ăt khŏm gum pơgôp, ngă hrŏm jar kmar, amăng kual dong. Tui hăng Khua git gai pơ ala mơnuih ƀon sang dêh čar ơi Vương Đình Huệ, kiăng hmao pơsir hĭ hơdôm tơlơi tơnap tap, pơsir hĭ hơdôm tơlơi aka ƀu dưi ngă, pơtrut rŭ glăi, pơđĭ kyar bơwih ƀong huă amăng hrơi blan pơ anăp, hơdôm anom bruă mơng Ƀirô khua git gai pơ ala mơnuih ƀon sang dêh čar, Kơnuk kơna kiăng gir kơtir, ječ ameč kơsem min, kiăo tui hơdôm tơlơi pơgôp hiăp yôm mơng ƀing rơgơi kơhnâo, ƀing kơsem min boh thâo, hơdôm anom bruă amăng dêh čar hăng čar rơngiao, ƀing rơgơi bruă bơwih ƀong sĭ mơdrô či ba tơbiă hơdră pơsir tañ hăng lăp djơ̆.

Siu H’Mai: Pơblang