VOV4.Jarai-Mă bruă hăng anom bruă Djă pioh mrô mơnuih dêh čar, Sang bruă tơhan pơlih wai lăng plơi pla hăng mơnuih mơnam, Ding jum kông an tlam lơ 27/8, ơi Vương Đình Huệ Khua git gai pơ ala mơnuih ƀôn sang dêh čar lăi pơtong, mrô mơnuih dêh čar jing dram gơnam dêh čar, yua kơ anun, kiăng wai lăng, pơgang ba, mă yua mrô rơnoh djơ̆ hơdră, pơđĭ tui boh yôm amăng bruă yua mrô rơnoh anai pioh pơtrut bruă bơwih ƀong huă mơnuih mơnam lŏn ia.

Hơdôm hrơi anai, dêh čar ta hlăk ĕp djop hơdră pơhlôm, pơgang klin duăm ruă. Khua git gai pơ ala mơnuih ƀôn sang dêh čar ơi Vương Đình Huệ rơkâo, Ding jum kông an ăt git gai tơhan djop anom bruă ngă bruă hur har hloh pơ anih dŏ pơ anăp adih, kiăng pơgăn klin Covid 19, hur har hăng abih glông kơđi čar ngă bruă pơgăn, pơtrut đuăi klin kheng tañ hloh. Hăng bruă mă čih pơtum mrô rơnoh mơnuih mơnam, plơi pla, anih ngă hmua, pơkra brơi hăng wai lăng rup kak mơnuih ƀôn sang, ơi Vương Đình Huệ lăi pơtong, mrô rơnoh mơnuih dêh čar hăng plơi pla jing dram gơnam dêh čar.

Yua kơ anun, khom wai lăng, mă yua mrô mơnuih jŭ yap khom djơ̆ hăng rơnoh yôm pioh pơtrut tơlơi bơwih ƀong huă mơnuih mơnam lŏn ia.

Nay Jek: Pơblang