VOV4.Jarai -  Mơguah lơ 18/5, ƀơi Sang bruă Khua pơ ala mơnuih ƀon sang dêh čar, ơi Vương Đình Huệ, Khua git gai pơ ala mơnuih ƀon sang dêh čar git gai Jơnum lăng nao rai amăng tivi abih bang klah čun bruă prăp lui hrơi ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026. Pơhiăp ƀơi mông Jơnum, ơi Vương Đình Huệ, Khua git gai pơ ala mơnuih ƀon sang dêh čar, Khua Khul wai lăng bruă ruah khua brơi thâo, truh mông anai, sa, dua bruă prăp lui mông ruah khua hơmâo ngă giong laih, kơjăp bruă pơphun mông ruah khua amăng lơ 23/5 anai laih. Khul wai lăng bruă ruah khua Dêh čar pơsit pơphun Jơnum lăng nao rai amăng tivi abih bang anih kiăng lăng glăi djŏp bruă prăp rơmet truh ră anai, hmư̆ tơlơi pơgôp hiăp hăng pơsir hĭ djŏp tơlơi aka ƀu rơđah, tơlơi tơnap, hơdôm tơlơi rơkâo đĭ mơng hơdôm tơring čar, ƀong prong, hơdôm anom bruă bơdjơ̆ nao kiăng thâo hluh hrŏm, gir prăp rơmet klă hloh kơ mông ruah khua - sa tơlơi jơnum kơđi čar prong yôm biă mă mơng lŏn ia ta dưi pơphun djơ̆ akŏ bruă blung a, sit nik jing Hrơi jơnum prong mơng lŏn ia. Hrơi jơnum mơ-ak mơng abih bang mơnuih laih anun truh kih.