VOV4.Jarai-Mơguah lơ 5/12, ƀơi anom jơnum prong Lê Hồng Phong, ƀôn prong Hà Nội pơphun jơnum Bơkơtuai tơlơi bơwih ƀong huă Việt Nam thun 2021 hăng akŏ ñu “Rŭ glăi hăng pơđĭ kyar hơđong kjăp”.

Pơhiăp ƀơi mông jơnum, Khua git gai pơ ala mơnuih ƀôn sang dêh čar ơi Vương Đình Huệ brơi thâo, jơnum bơkơtuai kơ tơlơi bơwih ƀong huă Việt Nam thun 2021 tal anai lĕ mông gêh găl pioh kơ khua mua pơ ala mơnuih ƀôn sang dêh čar, djop sang bruă, anom bruă kơnuk kơna pơđing hmư̆ tơlơi pơgôp hiăp mơ̆ng ƀing mơnuih rơgơi kơhnâo, mơnuih hrăm lu, kơsem min prong djop bruă amăng dêh čar hăng dêh čar tač rơngiao, hơdôm bơnah ngă hrom pơđĭ kyar mơ̆ng Việt Nam, ƀing pơ ala mơnuih ƀôn sang dêh čar găn rơgao lu gưl, mơnuih ƀôn sang, ƀing ruah khua, ƀing ngă bruă sĭ mơdrô amăng dêh čar pơyơr ia rơgơi tơlơi kơhnâo djru kơ dêh čar.

Khua git gai pơ ala mơnuih ƀôn sang dêh čar ơi Vương Đình Huệ brơi thâo, hơdôm boh yôm phun, jơlan hơdră, prăk kăk laih anun tơlơi rơkâo amăng mông jơnum anai gah rơngiao kơ jơlan hơdră prăk kăk mơ̆ng khua pơ ala mơnuih ƀôn sang dêh čar pơsit, brơi hơduah ĕp sa anih, sa kual lŏn mơnai, bruă ngă gah rơngiao tơlơi pơsit prong mơ̆ng khua mua pơ ala mơnuih ƀôn sang dêh čar.

Nay Jek: Pơblang