VOV4.Jarai - Ƀơi Ƀirô mă bruă, grup mrô 1, Khul git gai hơdôm akŏ bruă “Hơdră pơjing hăng pơgiong Kơnuk kơna tui hơdră xã hội chủ nghĩa Việt Nam truh thun 2030, anăp nao thun 2045”  pơphun jơnum bơkơtuai hăng ƀing rơgơi kơhnâo sa, dua boh tơhnal djru amăng bruă čih pơkra tơlơi phiăn hăng bruă pơsir kơđi tơlơi truh thun 2030, anăp nao thun 2045. Khua git gai pơ ala mơnuih ƀon sang dêh čar ơi Vương Đình Huệ git gai mông jơnum anai. Đĭ pơhiăp amăng mông jơnum, ơi Vương Đình Huệ brơi thâo, anai lĕ boh tơhnal tơnap, kiăng bơkơtuai tong ten, kơsem min, yua anun kiăng hmư̆ tơlơi pơgôp hiăp mơng ƀing rơgơi kơhnâo. Yua anun, Khua git gai pơ ala mơnuih ƀon sang čang rơmang ƀing rơgơi kơhnâo pơgôp hiăp amăng 3 boh tơhnal phun anun lĕ: hơdră mut hrŏm sa dua boh tơhnal; tơlơi pơkă amăng čih pơkra, pơgiong črăn tơlơi phiăn hăng bruă pơsir kơđi tơlơi; hơnong pơkă, hơdră bruă čih pơkra tơlơi phiăn hăng bruă pơsir kơđi tơlơi truh thun 2030, anăp nao thun 2045 djơ̆ hăng tơlơi rơkâo amăng pơjing, pơgiong Kơnuk kơna tui hơdră Xã hội chủ Nghĩa Việt Nam.

Siu Đoan: Pơblang