VOV4.Jarai - Mơguah lơ 19/10, ƀơi Ƀirô mă bruă, Khua git gai pơ ala mơnuih ƀon sang dêh čar ta ơi Vương Đình Huệ git gai jơnum lok 2 Khul git gai akŏ bruă pơjing hăng pơgiong Kơnuk kơna tui hơdră Xã hội chủ nghĩa Việt Nam truh thun 2030 anăp nao thun 2045. Amăng mông jơnum anai, Khul git gai hơmâo sem lăng hơdră bruă lăi pơthâo bruă mă mrô 10 pơgiong bruă pơpha, gum hrŏm hăng wai lăng kơplah wah hơdôm anom bruă lơ̆m ngă tui tơlơi dưi djơ̆ tơlơi phiăn kơplah wah hơdôm anom bruă, khul grup amăng bruă phaih phiăn brơi djơ̆ hăng tơlơi rơkâo pơjing, pơgiong Kơnuk kơna tui hơdră xã hội chủ nghĩa Việt Nam.

Đĭ pơhiăp pơđut mông jơnum, Khua git gai pơ ala mơnuih ƀon sang dêh čar ơi Vương Đình Huệ rơkâo, pă hră lăi pơthâo bruă mă hơmâo pơčrông sai lêng hơmâo sa, dua tơlơi pơkă hrŏm, anun lĕ, kơnuk kơna ngă bruă djơ̆ tơlơi phiăn lĕ tơlơi yôm hrŏm kơ ană mơnuih. Hơdră Kơnuk kơna ngă bruă djơ̆ tơlơi phiăn xã hội chủ nghĩa Việt Nam kiăng djơ̆ tui tơlơi kiăng mơng ană mơnuih, laih dong tui hơdră xã hội chủ nghĩa. Kơnuk kơna ăt hơmâo anŏ phara tui hơdră ngă pô, tơlơi pơkă mơng Kơnuk kơna, hơmâo phara, wai lăng kơplah wah hơdôm anom bruă. Yua anun, akŏ bruă kiăng kơ hruă kjăp, ngă tui djơ̆, pơhlôm tong ten tui hơdôm tơlơi anai.

Siu Đoan: Pơblang