VOV4.Jarai-Mơguah lơ 10/6, ƀơi sang jơnum khua mua pơ ala mơnuih ƀôn sang dêh čar, jơnum lok 7 mơ̆ng Khul khua mua ruah khua dêh čar. Khua git gai pơ ala mơnuih ƀôn sang dêh čar, Khua khul ruah khua dêh čar ơi Vương Đình Huệ git gai jơnum.

Pơhiăp ƀơi mông jơnum, ơi Vương Đình Huệ brơi thâo, tơdơi kơ prăp rơmet tong ten, tơpă, khut khăt, tum teč, djơ̆ rơ-uă hăng thâo pơčeh phrâo, tal ruah khua pơ ala mơnuih ƀôn sang dêh čar, khua mua pơ ala djop gưl pơphun tŭ yua mơak klă, mơnuih ƀôn sang ngă khua pô, bơkơnar, djơ̆ tơlơi phiăn hăng rơnuk rơnua, thâo pơkrem tŭ yua hiam klă.

Ƀơi mông jơnum anai, Khul pơphun bruă ruah khua dêh čar hơmâo pơgôp hiăp hăng pơsit hră čih pioh kơ bruă ruah khua pơ ala mơnuih ƀôn sang dêh čar tal 15; Hră pơtrun lăi pơthâo boh tơhnal ruah khua, anăn ƀing djơ̆ mơnuih ƀôn sang ruah ngă pô pơ ala mơnuih ƀôn sang dêh čar tal 15.

Kơ jơlan hơdră, hrơi blan, ding kơna, boh yôm phun hơdră jơnum đơ đam dêh čar pơƀut bruă pơphun ruah khua pơ ala mơnuih ƀôn sang dêh čar tal 15, khua mua pơ ala mơnuih ƀôn sang djop gưl rơwang bruă thun 2021-2026, ơi Vương Đình Huệ Khua git gai pơ ala mơnuih ƀôn sang dêh čar rơkâo pơphun mơ̆ng ataih, lăng nao rai amăng tivi hăng 63 boh tơring čar, ƀôn prong. Jơnum anai, him lăng pơphun amăng lơ 15 blan 7 thun 2021.

Nay Jek: Pơblang