VOV4.Jarai - Mơguah tom brơi (12/7), ƀơi Ƀrô mă bruă, Khua git gai pơ ala mơnuih ƀon sang dêh čar, Khua khul pơphun plĕ hră ruah khua dêh čar ơi Vương Đình Huệ hơmâo mông git gai jơnum lok 8, anai lĕ jơnum rơnuč mơng Khul pơphun plĕ hră ruah khua. Khua git gai pơ ala mơnuih ƀon sang dêh čar ơi Vương Đình Huệ brơi thâo, tơdơi kơ ruah đĭ ngă khua pơ ala mơnuih ƀon sang, abih bang gưl Jơnum min pơ ala mơnuih ƀon sang truh ră anai hơmâo pơgiong jơnum blung a hăng ruah giong mơnuih apăn bruă amăng Jơnum min pơ ala mơnuih ƀon sang, Jơnum min mơnuih ƀon sang gưl tơring čar, tơring glông truh pơ gưl să.

Khua git gai pơ ala mơnuih ƀon sang dêh čar hơmâo tŭ yap ƀing mơnuih ruah ngă khua, kơ-iăng khua Jơnum min pơ ala mơnuih ƀon sang gưl tơring čar. Amăng jơnum blung a, Khua pơ ala mơnuih ƀon sang dêh čar tal XV ruah ƀing khua mua pơprong amăng Kơnuk kơna hăng ruah ƀing khua mua prong pơkŏn hăng mrô lĕ 50 čô khua. Yua anun, tơdơi jơnum blung a mơng Khua pơ ala mơnuih ƀon sang dêh čar tal XV, abih bang bruă mă mơng khua mua djop gưl hơmâo ruah tơdơi kơ mông Jơnum.

Siu Đoan: Pơblang