VOV4.Jarai - Tlam mơmŏt lơ 22/11, ƀơi Ƀirô Khua pơ ala mơnuih ƀon sang dêh čar pơphun mông ngă lơphet jao Miđai 40 thun mut Ping gah, jao hră pơsit pơdơi bruă thun tha mơng Ding jum kơđi čar brơi kơ ƀing khua mua lĕ Ding kơna Khul apăn bruă Ping gah tal XII amăng Ƀirô Khua pơ ala mơnuih ƀon sang dêh čar hăng jao Miđai kơ khua mua apăn bruă amăng Ƀirô Khua pơ ala mơnuih ƀon sang dêh čar amăng Khul apăn bruă Ping gah dêh čar tal XIV lơ̆m ƀing gơñu ƀu tơbiă anăn ruah khua tal XV. Amăng mông ngă lơ phet Khua git gai pơ ala mơnuih ƀon sang dêh čar ơi Vương Đình Huệ jao Miđai 40 thun mut Ping gah hăng guang bơnga pơpŭ kơ Khua git gai pơ ala mơnuih ƀon sang dêh čar ta hơđăp yă Nguyễn Thị Kim Ngân; Kơ-iăng Khua git gai pơ ala mơnuih ƀon sang dêh čar hơđăp yă Tòng Thị Phóng. Pơ ala brơi Ping gah, Kơnuk kơna, Ơi Vương Đình Huệ jao Miđai rơngai mrô I kơ Kơ-iăng Khua git gai pơ ala mơnuih ƀon sang dêh čar hơđăp ơi Phùng Quốc Hiển; jao Miđai rơngai mrô II kơ 8 čô khua mua hăng miđai rơngai mrô III kơ 7 čô khua mua. Khua git gai pơ ala mơnuih ƀon sang dêh čar ơi Vương Đình Huệ lăi pơtŏng, ƀing khua mua hơmâo arăng jao hră pơsit pơdơi bruă thun tha hăng jao miđai mơng Kơnuk kơna tal anai lĕ ƀing khua mua sui thun mă bruă, ngă lu bruă pơprong amăng Kơnuk kơna, găn rơgao sui thun hrăm, gir run hăng thâo rơgơi lĕ ƀing khua mua ba gru kiăng kơ djop rơnuk tơdơi anai hrăm tui.

Siu Đoan: Pơblang