VOV4.Jarai - Mơguah lơ 23/9, ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ hơmâo git gai mông mă bruă hăng Khua mua amăng Ƀirô Khua pơ ala mơnuih ƀon sang dêh čar hăng Khua apăn bruă amăng Jơnum min bơwih ƀong huă, hmư̆ lăi pơthâo kơ sa, dua boh tơhnal kơ akŏ bruă mă yua lŏn mơnai amăng dêh čar rơwang thun 2021-2030, anăp nao thun 2050, Akŏ bruă mă yua lŏn mơnai 5 thun (2021-2025) amăng dêh čar. Đĭ pơhiăp amăng mông mă bruă, Khua git gai pơ ala mơnuih ƀon sang dêh čar ơi Vương Đình Huệ lăi pơtŏng, lŏn mơnai lĕ dram gơnam yôm phiăn amăng dêh čar, yua anun bruă wai lăng, mă yua ƀu djơ̆ kơnong brơi lăp djơ̆ hăng ră anai đôč ôh mơ̆ kiăng lăng nao pơgi kơdih dong; laih dong, lŏn mơnai kiăng kơ pơhrua dong hơdôm hơdră mă yua sui thun ƀu djơ̆ kơnong amăng 5 ƀudah 10 thun đôč ôh, kiăng kơ lăng nao sui thun dong kiăng pơđĭ kyar lŏn ia. Tui jơlan hơdră, Akŏ bruă mă yua lŏn mơnai amăng dêh čar rơwang thun 2021-2030, anăp nao thun 2050 hăng akŏ bruă mă yua 5 thun 2021-2025 amra mơ-it nao Khua pơ ala mơnuih ƀon sang dêh čar amăng jơnum lok 2, Jơnum Khua pơ ala mơnuih ƀon sang dêh čar XV. Him lăng, boh tohnal anai amra hơmâo Jơnum min apăn bruă Khua pơ ala mơnuih ƀon sang dêh čar pơgôp hiăp amăng tal jơnum lok 4 (blan 10/2021).

Siu Đoan: Pơblang