VOV4.Jarai-Tlam lơ 13/6, ƀơi sang bruă khua pơ ala mơnuih ƀôn sang dêh čar, ơi Vương Đình Huệ hơmâo git gai jơnum hăng khua jơnum min djop bruă gah mơnuih mơnam, hơdôm anom bruă gah sang bruă khua pơ ala mơnuih ƀôn sang dêh čar, kơ jơlan hơdră djru mơnuih mă bruă rơngiă hĭ bruă laih anun ƀing bơbeč djŏ yua klin Covid 19.

Tơdơi kơ hmư̆ tơlơi pơgôp hiăp mơ̆ng ƀing ding kơna amăng sang bruă khua pơ ala mơnuih ƀôn sang dêh čar, khua mua amăng kơnuk kơna, Khua git gai pơ ala mơnuih ƀôn sang dêh čar, ơi Vương Đình Huệ rơkâo, Khua mua Jơnum min djop bruă mơnuih mơnam ăt pok pơhai ngă tui Hră pơtrun mơ̆ng anom bruă pơ ala mơnuih ƀôn sang dêh čar hăng kơnuk kơna kơnang kơ hơdôm anom bruă pơ ala mơnuih ƀôn sang djop tơring čar; laih dơ̆ng rơkâo kơ kơnuk kơna tañ hloh pơƀut bruă mă djru kơ ƀing bơbeč yua klin Covid 19 ngă.

Kiăng djru hrom ngă tui tŭ yua hơdôm jơlan hơdră pơđĭ kyar bơwih ƀing huă mơnuih mơnam hăng jơlan hơdră djru kơ ƀing bơbeč djơ̆ yua klin Covid 19 hnun mơ̆n, ơi Vương Đình Huệ rơkâo, Kơnuk kơna hơmâo hơdră pơtrut tơlơi bơwih ƀong huă, mă yua prăk čan pơhaih rơđah rơđong pơ anăp; pơsir bruă tuh pơ alin, sĭ mơdrô, pơđĭ kyar bơwih ƀong huă sĭ mơdrô yua mơnuih ƀôn sang ngă pô, bơwih ƀong huă tui mrô hăng pơtrut sĭ mơdrô blơi gơnam amăng dêh čar; tañ ba hră pơtrun mơ̆ng jơnum ping gah dêh čar tal XIII amăng tơlơi hơdip mơda.

Nay Jek: Pơblang