VOV4.Jarai - Tlam lơ 17/12, ƀơi anom bruă Khul pơtom hiăp India, Khua git gai pơ ala mơnuih ƀon sang dêh čar ơi Vương Đình Huệ hăng Khua mua mơng Việt Nam nao ngă lơphet pioh hơdor glăi 5 thun hrơi akŏ pơjing bruă ngă hrŏm djop mơta kơplah wah Việt Nam- India. KHua ding jum pơtom hiăp India pơsit tong Việt Nam hăng India lĕ dua bơnah giang mah sui thun, đăo gơnang tơdruă, gum hrŏm pơđĭ kyar djop mơta bruă ƀu ah gơnah nao ôh hơdôm tơlơi gun găn, tơlơi lông lăng. Dua bơnah dŏ lu tơlơi dưi kiăng kơ ngă hrŏm anun lĕ boh thâo măi mok phrâo. Dua bơnah ăt hơmâo ngă hrŏm sit nik amăng bruă tui gru hơđăp hơmâo gru grua, pơtô pơjuăt hăng pơphun pơbưp nao rai mơnuih ƀon sang.

Đĭ pơhiăp amăng mông ngă lơphet, khua git gai pơ ala mơnuih ƀon sang dêh čar ơi Vương Đình Huệ rơkâo dua boh dêh čar pơ anăp anao gum hrŏm kjăp dong ngă tui klă hơdôm jơlan hơdră bruă mă thun 2021-2023 pok pơhai tơlơi rô nao rai djop bơnah hăng anăp nao rơnuk rơnua, pơdrong asah hăng hơmâo mơnuih ƀon sang tŭ yap amăng blan 12/2020 kiăng kơ kơtưn na nao tơlơi rô nao rao hiam klă ră anai kơplah wah dua boh dêh čar.  

Siu Đoan: Pơblang