VOV4.Jarai - Mơmot lơ 5/1, ƀơi Hà Nội, Gong phun pơdah rup Ƀirô khua git gai pơ ala mơnuih ƀon sang Việt Nam pơphun ngă lơphet hơdor glăi 7 thun hrơi pôr pơhing pơdah rup blung a (lơ 6/1/2015 - 6/1/2022) hăng ba pơƀuh Hệ sinh thái mrô. Khua git gai pơ ala mơnuih ƀon sang dêh čar ơi Vương Đình Huệ, Kơ-iăng khua git gai pơ ala mơnuih ƀon sang dêh čar ơi Trần Thanh Mẫn nao pơhmư̆ tom. Pơhiăp ƀơi mông ngă lơphet, Khua git gai pơ ala mơnuih ƀon sang dêh čar Vương Đình Huệ čang rơmang Gong phun pơdah rup Ƀirô khua pơ ala mơnuih ƀon sang Việt Nam pơtrut tui tơlơi dưi, tơlơi kơdrưh kơ-ang mơng anom bruă pôr pơhing pơdah rup mơng dêh čar, pơplih phrâo na nao, pơđĭ kyar anŏ klă, hăng mrô tơlơi pôr pơhing, sit nik pơtruh brơi Khua mua pơ ala mơnuih ƀon sang hăng mơnuih ƀon sang, kiăng “mơnuih ƀon sang dŏ pơpă lĕ Gong phun pơdah rup Khua pơ ala mơnuih ƀon sang Việt Nam kiăo tui ƀơi anun”.

Ƀrô hrơi anai, Gong phun pơdah rup Khua pơ ala mơnuih ƀon sang Việt Nam ba pơƀuh Hệ sinh thái mrô ƀơi plang internet tui glông web quochoitv.vn. Tơlơi anai čang rơmang amra jing anih phun pơdah thâo djŏp bruă mă mơng Anom bruă, Khua mua pơ ala mơnuih ƀon sang dêh čar, mơng djŏp anom bruă amăng  Ƀirô khua pơ ala mơnuih ƀon sang; ngă atur pơtruh na rai, pơčeh phrâo bruă bơwih brơi mơnuih ƀon sang dêh čar ta.

Siu H’Mai: Pơblang