VOV4.Jarai - Amăng tlam lơ 31/12/2021, ƀơi Sang bruă Khua pơ ala mơnuih ƀon sang dêh čar Hàn Quốc, plơi prong jưh jom Seoul, hơmâo ngă lơphet čơkă Khua git gai pơ ala mơnuih ƀon sang dêh čar ta ơi Vương Đình Huệ hăng Grup khua pơ ala mơnuih ƀon sang Việt Nam, yua Khua git gai pơ ala mơnuih ƀon sang dêh čar Hàn Quốc Park Byeong Seug git gai. Tơdơi kơ mông tŭ jum, Khua git gai pơ ala mơnuih ƀon sang dêh čar ơi Vương Đình Huệ hăng Khua git gai pơ ala mơnuih ƀon sang dêh čar Park Byeong Seug hrŏm hăng Grup khua pơ ala mơnuih ƀon sang dua bơnah pơphun jơnum. Dua čô khua pơsit, mah klin Covid-19 dŏ kơtang đôč samơ̆ tơlơi rô nao rai dua bơnah ăt đĭ kyar mơn amăng lu bruă, biă ñu bruă kơđi čar, bơwih ƀong huă, rơnuk rơnua, pơgang lŏn ia hăng bơbưp nao rai mơnuih ƀon sang. Dua bơnah tŭ ư pơđĭ tui tơlơi rô nao rai jing “Dêh čar ngă gŏp abih bang Việt Nam - Hàn Quốc” ƀrô hrơi ngă lơphet 30 thun hrơi akŏ pơdong tơlơi rô nao rai pơtom hiăp Việt Nam - Hàn Quốc. Khua git gai pơ ala mơnuih ƀon sang dêh čar ta ơi Vương Đình Huệ čang rơmang dêh čar Hàn Quốc amra lăi glăi tơlơi thâo rơgơi pơđĭ kyar bơwih ƀong huă, amăng anun hơmâo pơđĭ kyar mơtah, pơčeh phrâo. Dua bơnah pơsit gir ngă hơmâo rơnoh đĭ kyar sĭ mơdrô nao rai truh kơ 100 klai dolar Mi amăng thun 2023 hăng 150 klai dolar Mi amăng thun 2030.

Siu H’Mai: Pơblang